Latest Telugu Movie Reviews in Telugu

‘శ్రీకారం’

విశ్లేషణ

వ్యవసాయం.. పేరులోనే సాయం ఉంది. కానీ దానికి అయ్యే వ్యయాన్ని రైతు భరించలేని పరిస్థితులు ఏర్పడ్డాయి. అప్పులు చేసి పెట్టుబడి పెట్టి పంట పండించినా గిట్టుబాటు ధర రాక మరింతగా అప్పుల పాలు అవుతున్నాడు. పాత పద్ధతుల్లోనే వ్యవసాయం చేస్తూ నష్టాలు తెచ్చుకుంటున్నాడు. అయితే చదువుకున్న యువకులు వ్యవసాయం చేస్తే ఎంత లాభం ఉంటుందో తెలియజేసే కథే ‘శ్రీకారం’. వ్యవసాయం, రైతు యొక్క గొప్పతనాన్ని తెరపై చక్కగా చూపించాడు దర్శకుడు బి.కిశోర్‌. కష్టపడి పొలం పని చేసి పంటను పండించిన రైతు.. తన పంటను అమ్ముకోలేక ఎన్ని కష్టాలు పడుతున్నాడో ఈ  సినిమాలో కళ్లకు కట్టినట్లు చూపించారు. అలాగే రైతులకు అప్పులు ఇచ్చిన వడ్డీ వ్యాపారులు.. వారిని ఎలా పీక్కుతింటారనేది వాస్తవానికి దగ్గరగా చూపించాడు. మంచి సందేశాత్మక కథ అయినప్పటికీ.. ఇది అందరికి తెలిసిన సబ్జెక్టే.

రైతుల కష్టం నేపథ్యంలో ఇప్పటికే బోలెడు చిత్రాలు వచ్చాయి. కథ అందరికీ తెలిసినా దాన్ని కొత్త పద్ధతిలో చూపించే ప్రయత్నం చేసి సక్సెస్ అయ్యాడు డైరెక్టర్ కిశోర్. అయితే సినిమాలో స్లో నెరేషన్‌ ఒకటే ప్రేక్షకుడిని కాస్త ఇబ్బంది పెడుతుంది. మిగతా అంతా చక్కగా ఉంది. పల్లెటూళ్లలో పరిస్థితులు ఎలా ఉంటాయనేది కళ్లకు కట్టినట్లు చూపించాడు దర్శకుడు. తన ఊళ్లో తాను చూసిన క్యారెక్టర్లనే కథలో పెట్టానని సినిమా ప్రమోషన్స్‌లో చెప్పిన దర్శకుడు.. నిజంగా అలాగే తీశాడు. మిక్కీ జె. మేయర్ సంగీతం పర్వాలేదనిపించేలా ఉంది. పెంచలదాస్ రాసి పాడిన ‘వస్తానంటివో’ పాట తప్ప మిగతావన్ని అంతంతమాత్రంగానే ఉన్నాయి. పాటల సంగతి పక్కన పెడితే ఎమోషన్స్ పండించే విషయంలో దర్శకుడు వంద శాతం సక్సెస్ అయ్యాడని చెప్పాలి. హృదయం ఉన్న ప్రతి ఒక్కరికీ ఫస్ట్ ఆఫ్‌లో కానీ, సెకెండాఫ్‌లో కానీ ఏదో ఒక సీన్‌లో కన్నీళ్లు రాక మానవు.

డాక్టర్ కొడుకు డాక్టర్, యాక్టర్ కొడుకు యాక్టర్, పొలిటీషన్ కొడుకు పొలిటీషియన్.. ఇలా అన్ని రంగాల వాళ్ల పిల్లలు ఆయా రంగాల్లోకి వెళ్లాలని కోరుకుంటారు. అయితే ఒక్క రైతు కొడుకు మాత్రం రైతు కావడానికి ఇష్టపడడు. పొలంలో తన తండ్రి పడే కష్టం చూసి ఏ సాప్ట్‌వేర్ జాబో చూసుకుందామని అనుకుంటాడు. అలాగే తల్లిదండ్రులు కూడా తాము పడుతున్న కష్టాన్ని తమ పిల్లలు పడకూడదని అప్పులు చేసైనా చదివిస్తారు. అలా చదువుకున్న వాళ్లు వ్యవసాయం చేస్తే అన్నిటికంటే లాభసాటిగా ఉంటుందని చెప్పేదే ఈ శ్రీకారం ప్రధాన ఉద్దేశం. ఇక ఈ సినిమాకు ప్రధాన బలం బుర్రా సాయి మాధవ్‌ డైలాగ్స్‌.  ‘తినేవాడు నెత్తి మీద జుట్టంత ఉంటే.. పండించేవాడు మూతి మీద మీసం అంత కూడా లేరు’అనే ఒక్క డైలాగ్ ఆలోచించేలా చేస్తుంది. తన పవర్‌ఫుల్ సంభాషణలతో రైతుల దీనగాథను వివరించారు. అలాగే ‘పనిని పట్టి పరువు.. పరువుని పట్టి పలకరింపు’, ‘ఉద్యోగం వస్తే అమ్మని బాగా చూసుకుందాం అని అనుకున్నానురా.. ఇప్పుడు ఉద్యోగం తప్ప ఇంకేం చూసుకోలేకపోతున్నా’అనే డైలాగ్స్‌ యువతను ఆలోచింపజేస్తాయి. స్క్రీన్‌ప్లే బాగుంది. ఎడిటర్‌ మార్తండ్‌ కె వెంకటేశ్‌ తన కత్తెరకు కాస్త పనిచెప్పాల్సింది. సినిమాటోగ్రఫీ, నిర్మాణ విలువలు సినిమా స్థాయికి తగ్గట్టుగా బాగున్నాయి.

నటీనటుల విషాయానికి వస్తే..

శర్వానంద్ అటు సాప్ట్ వేర్ ఇంజనీర్ గా ఇటు వ్యవసాయదారుడిగా రెండు పాత్రలలోనూ తన నటనతో మెప్పించాడు. కంప్యూటర్‌ ముందు యంత్రంలా పని చేసే యువ సాఫ్ట్‌వేర్‌ పొలంలోకి దిగితే ఎలా ఉంటుందన్నది కళ్లకు కట్టినట్లు చూపించారు. సాధారణ రైతు కుటుంబానికి చెందిన కార్తిక్‌ పాత్రలో శర్వానంద్‌ ఒదిగిపోయారు. తనకు ఉన్న అనుభవంతో కొన్ని ఎమోషనల్‌ సీన్లను కూడా చక్కగా పండించారు. కథనంతా తన భూజాన వేసుకొని శ్రీకారం సినిమాను నడిపించారు శర్వానంద్. ఈ సినిమాతో ఆయన నటన మరింత మెరుగుపడిందని చెప్పాలి.

చైత్ర పాత్రలో ప్రియాంకా అరుళ్‌ మోహన్ నటన పరంగాను, గ్లామర్ పరంగాను ఆకట్టుకుంది. ఇక ఈ సినమాకు మరో ప్రధాన బలం హీరో తండ్రి కేశవులు పాత్ర చేసిన రావు రామేశ్‌ది‌. నిరుపేద రైతు పాత్రలో రావు రమేశ్‌ ఒదిగిపోయారు. ఆయన డైలాగ్ డెలివరీ కూడా బాగుంది. కళ్లతోనే కొన్ని ఎమోషన్స్ పలికించారు. ఇక మంచితనం ముసుగు కప్పుకొని జనాన్ని మోసం చేసే ఏకాంబరం పాత్రలో సాయి కుమార్‌ కూడా ఆకట్టుకున్నారు. హీరో తల్లిగా ఆమని తన పాత్రలో ఒదిగిపోయారు. ఇక వీకే నరేశ్‌ ఈ సినిమాకు మరో ముఖ్య పాత్ర. కార్తీక్ మామ పాత్రలో ఎమోషన్స్ పండించారు. మురళి శర్మ, సత్య, సప్తగిరి తదితరులు తమ పాత్రల పరిధి మేరకు నటించారు.

{youtube}v=RODgu91FPIk|620|400|1{/youtube}

టెక్నికల్ అంశాలకు వస్తే..

సాంకేతికంగా సినిమా ఉన్న‌తంగా ఉంది. చిత్ర నిర్మాణ విలువలు ఉన్నతంగా వున్నాయి, యువ‌రాజ్ కెమెరా ప‌నిత‌నం, మిక్కీ జె.మేయ‌ర్ సంగీతం, బుర్రా సాయిమాధ‌వ్ సంభాష‌ణ‌లు చిత్రానికి బ‌లం. పాట‌లు, వాటి చిత్ర‌ణ కూడా అర్థ‌వంతంగా, సందర్భోచితంగా సాగుతాయి. రాజీలేని నిర్మాణ తెర‌పై క‌నిపిస్తుంది. ద‌ర్శ‌కుడు కిషోర్ క‌థ‌ని నిజాయ‌తీగా చెప్పే ప్ర‌య‌త్నం చేశారు. క‌మ‌ర్షియ‌ల్ అంశాల కోసం ఎక్క‌డా  నేల‌విడిచి సాము చేయ‌లేదు.

తీర్పు: అధునాతన సాంకేతిక పరికరాలతో ఉమ్మడి వ్యవసాయంతో ఐక్యంగా చేసే సాగు పండగకు ‘‘శ్రీకారం’’

చివరగా.. ఎమోషన్స్ పండించే ‘శ్రీకారం’

Posted: March 11, 2021, 1:48 pm
‘జాతిరత్నాలు’

విశ్లేషణ

క‌థగా చెప్పుకోవాలంటే ఇది చాలా చిన్న‌లైన్‌. ముగ్గురు సిల్లీఫెలోస్‌ని ఓ పెద్ద క్రైంలో ఇరికిస్తే ఏమ‌వుతుంది? దాని నుంచి  వాళ్లెలా బ‌య‌ట‌ప‌డ్డారు? అన్న‌ది అస‌లు క‌థ‌.  ఆరంభం నుంచి ముగింపు వ‌ర‌కూ సినిమా ఆద్యంతం వినోదం పంచ‌డ‌మే ల‌క్ష్యంగా కొన‌సాగుతుంటుంది. అలాగ‌ని క‌థ‌లో ఎక్క‌డా బ‌ల‌వంతంగా ఇరికించిన కామెడీ ట్రాక్‌లు ఉండ‌వు. శ్రీకాంత్‌, శేఖ‌ర్‌, ర‌విల పాత్ర‌ల్ని ద‌ర్శ‌కుడు తీర్చిదిద్దుకున్న‌ విధానంలోనే చ‌క్క‌టి వినోదం నిండి ఉంటుంది. అమాయ‌క‌త్వంతో నిండిన అవ‌తారాల‌తో తింగ‌రి ప‌నులు చేస్తూ వాళ్లు పంచే వినోదం ప్రేక్ష‌కుల్ని క‌డుపు చెక్క‌ల‌య్యేలా న‌వ్విస్తుంది. ఆరంభంలో ఈ ముగ్గురి పాత్ర‌ల్ని ప‌రిచ‌యం చేస్తూ వ‌చ్చే స‌న్నివేశాలతో ద‌ర్శ‌కుడు ప్రేక్ష‌కుల్ని మెల్ల‌గా క‌థ‌లోకి తీసుకెళ్లే ప్ర‌య‌త్నం చేశారు.

ఈ ముగ్గురూ హైదరాబాద్‌ వచ్చిన తర్వాత జరిగే ప్ర‌తి ఎపిసోడ్ స‌ర‌దాగా సాగిపోతుంటుంది. శ్రీకాంత్ తొలి చూపులోనే చిట్టిని ఇష్ట‌ప‌డ‌టం.. అత‌ని అమాయ‌క‌మైన చేష్ట‌ల‌కు ఆమె కూడా ప్రేమించటం.. ఈ నేపథ్యంలో చిట్టి తండ్రికీ శ్రీకాంత్‌కీ మ‌ధ్య వ‌చ్చే స‌ర‌దా సన్నివేశాల‌తో ఎలాంటి మ‌లుపులు లేకుండా క‌థ‌ను ముందుకు తీసుకెళ్లాడు ద‌ర్శ‌కుడు. ముఖ్యంగా వ‌చ్చీరాని ఇంగ్లీష్ మాట్లాడుతూ న‌వీన్ చేసే హంగామా.. ఫోన్‌లో సువ‌ర్ణ అనే గ‌ర్ల్ ఫ్రెండ్‌తో మాట్లాడుతూ రాహుల్ చేసే అల్ల‌రి.. మ‌ధ్య మ‌ధ్య‌లో వంట పేరుతో ప్రియ‌ద‌ర్శి పంచే న‌వ్వులూ అంద‌రినీ క‌డుపుబ్బా న‌వ్విస్తుంటాయి. ఎమ్మెల్యేపై హత్యాయత్నంతో విరామం ముందు కథను మలుపు తిప్పాడు దర్శకుడు.

ప్రథమార్ధంలో న‌వ్వులు పంచుతూనే క‌థ‌ను ప‌రుగులు పెట్టించిన ద‌ర్శ‌కుడు.. ద్వితీయార్ధంలో ఆ న‌వ్వుల‌ సంద‌డిలో ప‌డి క‌థ‌ని పూర్తిగా ప‌క్క‌దారి ప‌ట్టించాడ‌నిపిస్తుంది. ముఖ్యంగా సీరియ‌స్‌గా సాగాల్సిన చాలా ఎపిసోడ్ల‌ని స‌ర‌దాగా.. లాజిక్కుల‌కు దూరంగా న‌డిపించేశాడు. అయితే ఓవైపు క‌థ గాడి త‌ప్పిన‌ట్లు అనిపిస్తున్నా.. న‌వీన్‌, రాహుల్‌, ద‌ర్శిలు పంచే వినోదంలో ఆ లాజిక్కులు పెద్ద‌విగా క‌నిపించ‌వు. ముఖ్యంగా పోలీస్ స్టేష‌న్ ఇంటారాగేష‌న్ సీన్‌లో, క్లైమాక్స్‌లో వ‌చ్చే కోర్టు స‌న్నివేశాల్లో న‌వీన్ కామెడీ టైమింగ్ అంద‌రినీ క‌ట్టిప‌డేస్తుంది. నిజానికి సీరియ‌స్‌గా సాగాల్సిన ఈ స‌న్నివేశాల్ని కాస్త ప‌కడ్బందీగా రాసుకునే ప్ర‌య‌త్నం చేస్తే ద్వితీయార్ధం, క్లైమాక్స్ మ‌రింత ఆస‌క్తిక‌రంగా ఉండేవి.

నటీనటుల విషాయానికి వస్తే..

నవీన్‌ పోలిశెట్టి, ప్రియదర్శి, రాహుల్‌ రామకృష్ణలపైనే సినిమా అంతా రన్‌ అవుతుంది. ముగ్గురికి ముగ్గురూ పేరు పెట్టడానికి లేని విధంగా నటించారు. ఎవరి పాత్రలో వాళ్ళు ఇమిడిపోయి, మోస్ట్ నేచురల్‌ పెరఫారమెన్స్‌తో ఆడియన్స్‌ని నవ్వుల్లో ముంచెత్తారు అంటే అతిశయోక్తి కానేకాదు. ఇందులో మళ్ళీ నవీన్‌ పోలిశెట్టి మెయిన్‌ లీడ్‌ క్యారెక్టర్‌ కాబట్టి, బ‌లంగా లేని చాలా స‌న్నివేశాల్ని సైతం త‌న కామెడీ టైమింగ్‌తో ఎంతో చ‌క్క‌గా నిలబెట్టాడు. ముఖ్యంగా క్లైమాక్స్‌లో వ‌చ్చే కోర్టు ఎపిసోడ్‌లో నవీన్‌ న‌ట‌న‌ ప్రేక్ష‌కుల‌తో చ‌ప్ప‌ట్లు కొట్టిస్తుంది. సినిమా చాలా ఇంట్రస్టింగ్‌గా అనిపించడానికి ఎక్కువ బాధ్యత నవీన్‌ భుజాల మీదే పడింది. ఆ బాధ్యతని నవీన్‌ చాలా ఈజీగా నిర్వర్తించాడు.

నవీన్‌ బాడీ లాంగ్వేజ్‌ గానీ, ఎక్స్‌ప్రెషన్స్‌గానీ, డైలాగ్‌ డెలివరీ గానీ…..వేటికవే జోగిపేట శ్రీకాంత్‌ క్యారెక్టర్‌కి బాగా సూటయ్యాయి. ప్రియదర్శి, రాహుల్‌ రామకృష్ణ వారివారి పాత్రల పరిధి మేరకు ఎక్కడా ఏ లోటూ రానీయలేదు. ముర‌ళీశ‌ర్మ చ‌నిపోయాడ‌నుకొని.. ఆయ‌న బాడీని మాయం చేసేందుకు వాళ్లు చేసే ప్ర‌యాత్నాలు సినీప్రియుల్ని క‌డుపుబ్బా న‌వ్విస్తాయి. ఇక చిట్టి పాత్ర‌లో ఫ‌రియా అబ్దుల్లా కొత్త అమ్మాయే అయినా తన షేర్‌ని బాగా క్యారీ చేసింది. కోర్టు డ్రామా సినిమాలు చూసి కోర్టులో వాద‌న‌లు వినిపించే లాయ‌ర్‌గా ఆమె పండించిన వినోదం అంద‌రినీ అల‌రిస్తుంది. జ‌స్టిస్ బ‌ల్వంత్ చౌద‌రిగా బ్రహ్మానందంని చూపించిన విధానం బాగుంది. మురళీశర్మ, బ్రహ్మాజీ తదితరులు గురించి ప్రత్యేకంగా వివరించనే అక్కర్లేదు. అనుభవజ్ఞులు కాబట్టి సులభంగా చేసేశారు.

{youtube}v=Hgc07_BX4_8|620|400|1{/youtube}

టెక్నికల్ అంశాలకు వస్తే..

అనుదీప్ తాను అనుకున్న క‌థ‌ని అనుకున్న‌ట్లుగా తెరపై చూపించాడు. ఈ త‌రానికి త‌గ్గ‌ట్లుగా ట్రెండింగ్ పంచుల‌తో క‌థ‌ని చ‌క్క‌గా అల్లుకున్నారు. కానీ, వినోదం కోసం క్లైమాక్స్‌ని లాజిక్‌ లేకుండా ముగించార‌నిపిస్తుంది. ర‌ధ‌న్ అందించిన పాట‌లు సినిమాకి ప్ర‌ధాన బ‌లం. ముఖ్యంగా చిట్టి పాట ఎంత విన‌సొంపుగా ఉందో.. దాన్ని చిత్రీక‌రించిన విధానం కూడా అంత‌గా ఆక‌ట్టుకుంటుంది. మిగిలిన పాట‌లూ సంద‌ర్భానికి త‌గ్గ‌ట్లుగా విన‌సొంపుగానే ఉన్నాయి. సిద్ధం మ‌నోహ‌ర్ ఛాయాగ్ర‌హ‌ణం సినిమాకి మంచి రిచ్ లుక్ తీసుకొచ్చింది. నిర్మాణ విలువ‌ల ప‌రంగానూ సినిమా ఉన్న‌త స్థాయిలో ఉంది.

తీర్పు: అన్నింటినీ మర్చిపోయే రెండున్నర గంటల పాటు పూర్తి వినోదం అందించే గమ్మత్తు ‘‘జాతిరత్నాలు’’

చివరగా.. కడుపుబ్బా నవ్వించే హాస్యరత్నాలు ‘జాతిరత్నాలు’

Posted: March 11, 2021, 12:06 pm
‘చెక్’

 విశ్లేషణ

‘ఐతే’, ‘అనుకోకుండా ఒక రోజు’ చిత్రాలతో తన చిత్ర కథల ఎంపిక, టేకింగ్ ఎంతో విభిన్నంగా వుంటాయని నిరూపించుకుని ప్రేక్షకులకు దగ్గరైన దర్శకుడు చంద్రశేఖర్ యేలేటి కొంత గ్యాప్ తరువాత ‘చెక్’తో ఆయన మరో భిన్నమైన ప్రయత్నమే చేశాడు. చేయని నేరానికి ఉరిశిక్ష పడ్డ ఖైదీ.. తన తెలివితేటలతో ఎలా జైలు నుంచి బయటికి వచ్చాడనే పాయింట్ కు చెస్ గేమ్ నేపథ్యాన్ని ఎంచుకుని ప్రేక్షకులకు కొత్త అనుభూతిని పంచాలని చూశాడు. చెస్ నేపథ్యంలో యేలేటి సినిమా ప్రేక్షకులను అలరించింది. అయితే దాదాపుగా ప్రతీ ఇంట్లో ఓక చెస్ ఆటగాడు వున్న ఈ రోజుల్లో ఆటలోని నైపుణ్యాన్ని స్క్రీన్ ప్లే రూపంలో రక్తికట్టించడంలో యేలేటికి ఎన్ని మార్కులు వేస్తారన్నది ప్రేక్షకులే తేల్చాలి.

‘చెక్’లో ఉరిశిక్ష పడ్డ ఖైదీ నైపుణ్యం గల అటగాడిగా తీర్చిదిద్దిన విధానంలో ప్రేక్షకులను కన్విన్స్ చేయడంలో యేలేటి తడబడ్డాడు. తన తెలివి తేటలతో చిన్న చిన్న సైబర్ క్రైమ్స్ చేసుకునే హీరోకు ఉగ్రవాదిగా ముద్రపడి ఉరిశిక్ష పడటం వాస్తవికంగా అనిపించదు. అతను ఈ కేసులో ఇరుక్కునేందుకు దారి తీసే పరిస్థితులు నమ్మశక్యంగా లేవు. ఒక వ్యక్తికి ఉరి శిక్ష వేయడం అంటే.. అంత సాధారణంగా జరిగిపోదు. సాక్ష్యాలు పక్కాగా ఉండాలి. ఆ వ్యవహారం అంతా ఎంతో పకడ్బందీగా అనిపించాలి. కానీ ‘చెక్’లో చాలా విషయాలు పైపైన చూపించేసి హీరోను దోషిగా నిర్ధారించేసినట్లు అనిపిస్తుంది. హీరో ఎంత బలంగా ఇరుక్కుంటే అతడి మీద సానుభూతి కూడా అంత ఎక్కువగా ఉంటుంది. అతను ఎలా బయటపడతాడనే ఉత్కంఠ రేగుతుంది. ‘చెక్’లో ఆ ఉత్కంఠే మిస్ అయింది.

‘చెక్’లో ప్రేక్షకులను అలరించే అంశాలు లేవనేమీ కాదు. ప్రథమార్ధంలో ‘చెక్’ చాలా వరకు ఎంగేజింగ్ గానే సాగుతుంది. ఆరంభ సన్నివేశాలు ఆసక్తి రేకెత్తిస్తాయి. నేరుగా ఉరి శిక్ష పడ్డ ఉగ్రవాదిగా హీరోను పరిచయం చేయడంతో దీని వెనుక కథేంటో తెలుసుకోవాలన్న ఆసక్తి పుట్టేలా సినిమా మొదలవుతుంది. హీరోకు మొదట పరిస్థితులన్నీ ప్రతికూలంగా.. అన్ని దారులూ మూసుకుపోయినట్లు చూపించి.... ఆ తర్వాత అతడి ఒక్కోటి ఓపెన్ చేయడంతో ప్రేక్షకులు కథలో ఇన్వాల్వ్ అవుతారు. హీరో చదరంగం వైపు ఆకర్షితుడై ఆ ఆటలో నైపుణ్యం సాధించే సన్నివేశాలు ఆకట్టుకుంటాయి. ముఖ్యంగా హీరోను చీకటి గదిలో వేస్తే.. కిటికీ గళ్ల ప్రతిబింబాన్నే చెస్ బోర్డుగా ఊహించుకుని అతను ఆటలో నేర్పు సాధించే సన్నివేశంలో యేలేటి మార్కు కనిపిస్తుంది.

కాగా, హీరో ఫ్లాష్ బ్యాక్ ఎపిసోడ్ అంతగా రక్తికట్టలేదు. ప్రియ ప్రకాష్ పాత్రను పేలవంగా తేలిపోయింది. ఇంటర్వెల్ బ్యాంగ్ ఆకట్టుకుంటుంది. ద్వితీయార్ధంపై ఆసక్తి పెంచుతుంది. కానీ ఆ తర్వాత యేలేటి అనుకున్నంత ఆసక్తికరంగా కథనాన్ని నడిపించలేకపోయాడు. ద్వితీయార్ధంలో జైలు సన్నివేశాలు రిపీటెడ్ గా అనిపిస్తాయి. హీరో చదరంగంలో అంతర్జాతీయ  స్థాయికి ఎదిగిపోయే సన్నివేశాలు టూమచ్ అనిపిస్తాయి. క్లైమాక్స్ ట్విస్టు మీద పూర్తిగా డిపెండ్ అయిపోయిన దర్శకుడు... దానికి ముందు సన్నివేశాలను తేల్చేశాడు. ముగింపులో మలుపు థ్రిల్ చేసినా.. ఈ కథకు ఇది సరైన ముగింపేనా అన్న ప్రశ్న తలెత్తుతుంది. ఈ కథను అసంపూర్తిగా వదిలేసిన భావన కలుగుతుంది. అయినప్పటికీ ఈ చిత్రానికి క్లైమాక్సే హైలైట్.

నటీనటుల విషాయానికి వస్తే..

నితిన్ ఆదిత్య పాత్రకు చక్కగా సరిపోయాడు. అతడి స్క్రీన్ ప్రెజెన్స్ బాగుంది. పరిణతితో కూడిన నటనతో ఆకట్టుకున్నాడు. అతను ఇలాంటి ఫుల్ లెంగ్త్ సీరియస్ రోల్ చేయడం కొత్తగా అనిపిస్తుంది. కొన్ని సన్నివేశాల్లో చక్కటి హావభావాలు ఇచ్చాడు. రకుల్ ప్రీత్ కూడా ఇందులో కొత్తగా కనిపించింది. కానీ ఆమె లుక్ ముందున్నంత ఆకర్షణీయంగా లేదు. తన పాత్ర జస్ట్ ఓకే అనిపిస్తుందంతే. ప్రియ ప్రకాష్ వారియర్ ఏ రకంగానూ ఆకట్టుకోదు. ఆ పాత్రను మరీ పేలవంగా తీర్చిదిద్దాడు యేలేటి.

కనిపించిన కాసేపు గ్లామర్ ఎటాక్ చేయడం తప్పితే ప్రియ ఇందులో చేసిందేమీ లేదు. సినిమాలో అందరిలోకి.. హీరో నితిన్ కంటే కూడా బాగా నటించిందంటే సాయిచందే. సెకండ్ ఇన్నింగ్స్ లో ప్రతి సినిమాతోనూ ఆశ్చర్యపరుస్తున్న ఆయన శ్రీమన్నారాయణ పాత్రలో టాప్ క్లాస్ పెర్ఫామెన్స్ ఇచ్చాడు. ఇంకెవరూ ఆ పాత్రను ఇంతకంటే బాగా చేయలేరు అనిపించేలా చేశాడు. సంపత్.. మురళీ శర్మ పాత్రలు.. వారి నటన మామూలే. పోసాని తన పాత్ర పరిమితి మేరకు నటించారు.

{youtube}v=tSd3jUC4Wbg|620|400|1{/youtube}

టెక్నికల్ అంశాలకు వస్తే..

సినిమాలో సాంకేతికంగా పెద్ద సానుకూలత కళ్యాణి మాలిక్ నేపథ్య సంగీతం. ప్రతి సన్నివేశాన్నీ ఆర్ఆర్ తో ఎలివేట్ చేయడానికి అతను ప్రయత్నించాడు. నేపథ్య సంగీతం ద్వారా ఒక మూడ్ క్రియేట్ చేయడానికి కృషి చేశాడు. రాహుల్ శ్రీవాస్తవ్ ఛాయాగ్రహణం బాగుంది. ఎక్కువ సన్నివేశాలు జైలు గోడల మధ్యే సాగినా.. మరీ మొనాటనస్ అనిపించకుండా కెమెరా పనితనం చూపించాడు. భవ్య వారి నిర్మాణ విలువలకు ఢోకా లేదు. నరేష్ రెడ్డి మాటల్లో మెరుపులున్నాయి. ముఖ్యంగా చదరంగంలోని జంతువుల గురించి చెప్పే మాటలు.. హీరో ఫిలాసఫీకి సంబంధించిన డైలాగ్స్ ఆకట్టుకుంటాయి.

ఇక దర్శకుడు యేలేటి విషయానికొస్తే.. ఆయన ఎంచుకున్న పాయింట్ విభిన్నమైనదే అయినా.. పతాక సన్నివేశాల మీద పెట్టిన దృష్టి.. దానికి ముందు సన్నివేశాలపై మాత్రం అంతగా లేదనే చెప్పాలి. కానీ దాన్ని అనుకున్నంత ఆసక్తికరంగా ప్రెజెంట్ చేయలేకపోయాడు. కొన్ని సన్నివేశాల్లో.. క్లైమాక్స్ లో యేలేటి ముద్ర కనిపించినా.. ఓవరాల్ గా ఆయన్నుంచి ఆశించే బ్రిలియన్స్ సినిమాలో మిస్సయింది. జైల్లోనే చాలా వరకు కథను నడిపించేలా స్క్రిప్టు రాసుకోవడంతో ఆయన తనను తాను బంధనాలు వేసుకున్నట్లయింది. స్క్రీన్ ప్లేతో వైవిధ్యం చూపించడానికి.. ఉత్కంఠ రేపడానికి అవకాశం లేకపోయింది.

తీర్పు: యేలేటి మార్కు మెరుపులతో.. నితిన్ నటనతో ఆకట్టుకున్న ‘‘చెక్’’

చివరగా.. గెలుపోటములకు మధ్య డ్రాగా ముగిసిన ‘చెక్’

Posted: February 26, 2021, 12:30 pm
‘నాంది’

విశ్లేషణ

అక్ర‌మ నేరారోప‌ణ‌తో జైల్లో మ‌గ్గుతున్న ఓ యువ‌కుడి పోరాట‌మే ఈ చిత్రం. భార‌తీయ శిక్షా స్మృతిలోని సెక్ష‌న్ 211 ఎంత శ‌క్తిమంత‌మైన‌దో ఇందులో ఆలోచ‌న రేకెత్తించేలా చెప్పారు. ఒక అమాయ‌కుడి జైలు జీవితం... అతను న్యాయం కోసం చేసే పోరాటమే ఈ సినిమా ప్రధాన ఇతివృత్తం. ప్ర‌థ‌మార్ధంలో సూర్య‌ప్ర‌కాష్ జీవితం, ఊహించ‌ని రీతిలో జైలు గోడ‌ల మ‌ధ్య‌కి చేర‌డం నేప‌థ్యంలో సాగుతుంది. ద్వితీయార్ధంలో కోర్ట్ రూమ్ డ్రామా కీల‌కం. అండ‌ర్ ట్ర‌య‌ల్ ఖైదీగా క‌థానాయ‌కుడిని జైలుకి తీసుకెళ్ల‌డంతోనే సినిమాను మొదలు పెట్టిన దర్శకుడు, జైల్లో అతని జీవితం గురించి వివ‌రించ‌డంతో అసలు కథ ప్రారంభమవుతుంది.

ఉద్యోగం సంపాదించిన ఓ మ‌ధ్య త‌ర‌గ‌తి కుర్రాడు త‌న భ‌విష్య‌త్తు కోసం త‌ల్లిదండ్రులు త్యాగం చేసిన చిన్న చిన్న ఆనందాల్ని గుర్తు పెట్టుకుని వాటిని తీర్చే స‌న్నివేశాలు మ‌న‌సుల్ని హ‌త్తుకుంటాయి. భావోద్వేగాల‌పై అక్క‌డ్నుంచే పట్టు ప్ర‌ద‌ర్శించాడు ద‌ర్శ‌కుడు. అంతా హాయిగా.. సంతోషంగా సాగుతున్న ఆ కుటుంబం ఒక్క‌సారిగా ఇబ్బందుల్లో ప‌డ‌టం, చేతికందివ‌చ్చిన కొడుకు అన్యాయంగా జైలుపాలు కావ‌డంతో ఆ కుటుంబం ప‌డే బాధ‌ని చ‌క్క‌గా తెర‌పైకి తీసుకొచ్చారు. విరామానికి ముందు వ‌చ్చే మ‌లుపు ఈ క‌థ‌ని మ‌రింత ఉత్కంఠ‌ భ‌రితంగా మారుస్తుంది.

ద్వితీయార్ధంలో కోర్టు రూమ్ నేప‌థ్యంలో సాగే స‌న్నివేశాలు హైలైట్‌గా నిలిచాయి. స‌హ‌జంగానే వాటిలో కావాల్సినంత డ్రామా పండింది. బ‌ల‌మైన భావోద్వేగాలు... ఆస‌క్తిని రేకెత్తించే క‌థ‌నంతో సినిమా ఆద్యంతం క‌ట్టిప‌డేస్తుంది. ఎంచుకున్న అంశం సాధార‌ణ‌మైన‌దే. కానీ, దాన్ని ఆక‌ట్టుకునే క‌థ‌నంతో చెప్ప‌డంలో ద‌ర్శ‌కుడు త‌న ప్ర‌తిభ‌ని ప్ర‌ద‌ర్శించాడు. ఇలాంటి అంశాల్ని స్పృశిస్తున్న‌ప్పుడు ఎంతో ప‌రిశోధ‌న కావాలి. ద‌ర్శ‌కుడు ఆ ప‌రిశోధ‌న కావాల్సినంత చేశాడనిపిస్తుంది. అల్ల‌రి న‌రేశ్‌ కెరీర్‌కి ఈ సినిమా ఓ కీల‌క మ‌లుపు. ఇక‌పై ఆయ‌న కొత్త అడుగులు వేయ‌డానికి ఇదొక నాంది అవుతుంద‌న‌డంలో సందేహం లేదు. న‌టుడిగా న‌రేశ్‌ని కొత్త కోణంలో ఆవిష్క‌రించిన ఈ చిత్రంలో, ఆయ‌న మేకోవ‌ర్ మ‌రో ప్ర‌ధాన ఆక‌ర్ష‌ణ. ఇలాంటి క‌థ‌లు బాలీవుడ్‌లో త‌ర‌చూ రూపొందుతుంటాయి. తెలుగు సినిమా క‌థ‌ల్లోనూ మార్పునకు ఈ చిత్రం నాంది ప‌లుకుతుంది.

నటీనటుల విషాయానికి వస్తే..

అల్లరి నరేష్ కెరీర్లో ఎన్నడూ చేయని ఇంటెన్స్ క్యారెక్టర్ కోసం ప్రాణం పెట్టేశాడు. అతడి కామెడీ ఇమేజ్ సినిమా మొదలైన కాసేపటికే పక్కకు వెళ్లిపోయి సీరియస్ గా ప్రేక్షకులు ఈ సినిమాలో ఇన్వాల్వ్ అయ్యేలా చేస్తుందీ పాత్ర. కామెడీ హీరో అయిన నరేష్ ఈ పాత్రకు సెట్టవ్వలేదు అనిపించకపోవడమే అతను సాధించిన విజయం. పోలీస్ స్టేషన్.. జైలు నేపథ్యంలో వచ్చే సన్నివేశాలన్నింటిలో అతడి నటన హృద్యంగా సాగుతుంది. ఆ పాత్ర పట్ల సానుభూతి వ్యక్తమయ్యేలా చేస్తుంది.

నరేష్ కు కచ్చితంగా పెర్ఫామెన్స్ పరంగా కెరీర్ ఉత్తమ చిత్రాల్లో ఇదొకటి. హీరో తర్వాత అత్యంత కీలకమైన పాత్రలో వరలక్ష్మి శరత్ కుమార్ రాణించింది. తమిళ యాస బాగా కలిసిపోయిన ఆమె డబ్బింగ్ ఈ పాత్రకు సూటవ్వలేదు కానీ.. నటన పరంగా ఆకట్టుకుంది. విలన్ పాత్రల్లో హరీష్ ఉత్తమన్.. వినయ్ వర్మ బాగానే చేశారు. హీరో తండ్రిగా దేవీ ప్రసాద్ తక్కువ సన్నివేశాల్లోనూ తన ప్రత్యేకత చాటుకున్నాడు. హీరో స్నేహితుడిగా ప్రవీణ్ నటన బాగుంది. ప్రియదర్శి కూడా ఓకే.

{youtube}v=7xNouJHb7Z4|620|400|1{/youtube}

టెక్నికల్ అంశాలకు వస్తే..

శ్రీ చరణ్ పాకాల సంగీతం అతడి స్థాయికి తగ్గట్లు లేదు. ‘నాంది’లో పాటలకు పెద్దగా ప్రాధాన్యం లేదు. ఉన్న రెండు మూడు పాటలు కూడా చిన్నవే. మధ్యలో ఇలా వచ్చి అలా వెళ్లిపోయే ఆ పాటలు పర్వాలేదనిపిస్తాయి. నేపథ్య సంగీతంలో ఉండాల్సినంత ఇంటెన్సిటీ లేదు. ఎమోషనల్ సీన్లలో ఆర్ఆర్ హృద్యంగా అనిపించినా.. హీరో పోరాటం మొదలయ్యాక బ్యాగ్రౌండ్ స్కోర్ రెగ్యులర్ కమర్షియల్ సినిమాలను తలపించి సినిమా మూడ్ ను చెడగొడుతుంది. సిద్ ఛాయాగ్రహణం ఓకే. నిర్మాణ విలువలు సినిమా స్థాయికి తగ్గట్లు ఉన్నాయి.

తూమ్ వెంకట్ అందించిన కథలో కొత్తదనం ఉంది. అబ్బూరి రవి మాటలు కొన్ని చోట్ల ఆలోచింపజేస్తాయి. ఇక దర్శకుడు విజయ్ కనకమేడల చాలామంది అరంగేట్ర దర్శకుల్లా సేఫ్ గా కమర్షియల్ సినిమా తీయకుండా ఇలా ఓ భిన్నమైన ప్రయత్నం చేశాడు. కానీ.. ఈ భిన్నమైన కథను అనుకున్నంత పకడ్బందీగా తెరకెక్కించలేకపోయాడు. కొన్నిసార్లు ఇంటెన్స్ గా అనిపించే సినిమా.. కొన్నిసార్లు బిగి కోల్పోయినట్లు అనిపిస్తుంది. దర్శకుడిగా విజయ్ కు మంచి మర్కులే లభించినా.. ఈ చిత్రం పతాక సన్నివేశాల చిత్రీకరణలో ఆశించిన మేర ఉత్కంఠ మాత్రం లభించలేదు.

తీర్పు: అల్లరి అబ్బాయి చేత నటవిశ్వరూపాన్ని ప్రదర్శింపజేసిన ‘‘నాంది’’

చివరగా.. అల్లరి నరేష్ సినిమా కథల ఎంపికలో మార్పుకు నాంది..!

Posted: February 19, 2021, 1:16 pm
‘ఉప్పెన’

విశ్లేషణ

పెద్దింటి అమ్మాయి... పేదింటి అబ్బాయి మ‌ధ్య ప్రేమ ఎప్పుడూ ఆస‌క్తిక‌ర‌మే. అలాంటి ‌క‌థ‌లు తెలుగు తెర‌కు కొత్తేం కాదు. అంత‌స్తుల్లో గ‌డిపే అమ్మాయి... పూరి గుడిసె నుంచి వ‌చ్చిన అబ్బాయి  మ‌న‌సులు ఇచ్చి పుచ్చుకోవ‌డం చూడ‌టానికి ఎప్పుడూ ప్రత్యేక‌మే. ఆ జంట ప్రేమ‌లో ప‌డ్డాక  డ‌బ్బు, ప‌లుకుబ‌డి ప్రభావంతో  అడుగ‌డుగునా అడ్డంకులు ఎదుర‌వుతుంటాయి. వాటిని ఎదుర్కొని ముందుకు వెళ్లేకొద్దీ క‌థ ర‌క్తి క‌డుతుంటుంది. ‘ఉప్పెన’ కూడా అలాంటి క‌థ‌తోనే తెర‌కెక్కింది.  ప్రథమార్ధంలో సింహ‌భాగం స‌న్నివేశాలు ఆశి, సంగీత ప్రేమ ప్రయాణం నేప‌థ్యంలోనే సాగుతాయి. వాళ్లిద్దరూ ఒక‌నొక‌రు చూసుకోవ‌డం, మ‌న‌సులు ఇచ్చి పుచ్చుకోవ‌డం, ఆ  ప్రేమ గురించి ఇంట్లో తెలియ‌డం వంటి స‌న్నివేశాల‌తో ప్రథ‌మార్ధం సాగుతుంది.

ఈ ప్రేమ‌క‌థ స‌ముద్రం నేప‌థ్యంలో సాగ‌డం మ‌రింత ప్రత్యేకంగా అనిపిస్తుంది. ప్రేమ‌జంట పారిపోవ‌డం, వాళ్ల కోసం శేషారాయ‌నం మ‌నుషులు వెద‌క‌డం కోసం బ‌య‌ల్దేర‌డంతో ద్వితీయార్ధం మొద‌ల‌వుతుంది.  మ‌ధ్యలో చెప్పేందుకు కథేమీ లేక‌... కొన్ని స‌న్నివేశాలు సాగ‌దీత‌గా అనిపిస్తాయి.  ప్రీ క్లైమాక్స్ నుంచి సినిమా మ‌ళ్లీ ఆస‌క్తిని రేకెత్తిస్తుంది. సంగీత ఇంటికి రావ‌డం, తండ్రితో మాట్లాడే స‌న్నివేశాలు ర‌క్తిక‌ట్టిస్తాయి. అయితే అప్పటివ‌ర‌కూ కర్కశంగా క‌నిపించిన రాయ‌నం... చివ‌రిలో  కూతురు చెప్పే మాట‌ల్ని వింటూ నిలబడటం చూస్తుంటే ఒక్కసారిగా ఆ పాత్ర తేలిపోయిన‌ట్టు అనిపిస్తుంది. దర్శకుడు త‌న  ప్రత్యేక‌త‌ని ప్రద‌ర్శిస్తూ క్లైమాక్స్‌లో క‌థ‌నాన్ని మ‌లిచిన ‌విధానం మాత్రం ఆక‌ట్టుకుంటుంది. తెర‌పై సుఖాంతమ‌య్యే  ప్రేమ‌క‌థ‌ల్ని చూస్తుంటాం, విషాదాంతంగా మారే  ప్రేమ‌క‌థ‌ల్నీ చూస్తుంటాం. వాటికి భిన్నమైన ముగింపున్న చిత్రమిది.

నటీనటుల విషాయానికి వస్తే..

పంజా వైష్ణవ్ తేజ్ ఇలాంటి సినిమాను అరంగేట్రానికి ఎంచుకున్నందుకు హ్యాట్సాఫ్ చెప్పాలి. ఎందుకంటే ఒక పెద్ద ఫ్యామిలీ నుంచి వస్తున్న కొత్త హీరో ఎవరూ ఇలాంటి పాత్ర చేయడానికి సాహసించరు. సోషల్ మీడియాలో యాంటీ ఫ్యాన్స్ నుంచి ట్రోలింగ్ కు గురవడానికి ఆస్కారమున్న పాత్ర చేయడానికి సిద్ధ పడటం గొప్ప విషయం. లుక్స్ పరంగా కూడా చాలా యావరేజ్ గా కనిపించే డీగ్లామర్ పాత్ర అతడిది. ఎక్కడా కూడా హీరోలా అనిపించకుండా ఒక ముఖ్య పాత్రధారిలాగే కనిపించాడతను. వైష్ణవ్ నటనలో పరిణతి కనిపిస్తుంది. కొత్త వాడైనా చాలా త్వరగా అతడి పాత్రకు అలవాటు పడిపోయేలా చేయగలిగాడు.

హీరోయిన్ కృతి శెట్టి తన అందంతో నటనతో కట్టి పడేసింది. కొన్ని సన్నివేశాల్లో లుక్స్ పరంగా తేడాగా అనిపించినా.. ఓవరాల్ గా మెప్పించింది. పతాక సన్నివేశంలో ఆమె నటనకు క్లాప్స్ పడతాయి. ఇక విజయ్ సేతుపతి గురించి చెప్పేదేముంది? సినిమాను తన నటనతో మరో స్థాయికి తీసుకెళ్లాడు. అతడి కోసమే ఈ సినిమా చూడొచ్చు అనిపించాడు. రాయణం పాత్రలోకి అతను పరకాయ ప్రవేశం చేసిన తీరు ఎలాంటిదో తెరమీదే చూసి తెలుసుకోవాలి. ఐతే సేతుపతి వాయిస్ అందరికీ బాగానే పరిచయం కాబట్టి అతడికి రవిశంకర్ వాయిస్ సూట్ కాలేదు. ఇదొక్కటే ఈ పాత్ర విషయంలో ఇబ్బంది పెట్టే విషయం. హీరో తండ్రిగా సాయిచంద్ సహజమైన నటనతో ఆకట్టుకున్నాడు. సేతుపతి తండ్రిగా మహదేవన్ కూడా బాగా చేశాడు.

{youtube}v=fB3RcpbLvco|620|400|1{/youtube}

టెక్నికల్ అంశాలకు వస్తే..

దేవిశ్రీ ప్రసాద్ సంగీతంతో చిత్రం విడుదలకు ముందే మ్యూజికల్ హిట్ టాక్ సోంతం చేసుకుంది. ఉప్పెన ప్రేమకథలో ఫీల్ పెంచడంలో దేవి పాటలు కీలక పాత్ర పోషించాయి. ప్రేమికులను ఆయన తన సంగీతంతో మంత్రముగ్ధులను చేశారు. విజువల్ గానూ చాలా బాగుండటంతో ‘జల జలపాతం..’ సినిమాలో హైలైట్ గా నిలుస్తుంది. విలన్ పాత్రకు బ్యాగ్రౌండ్ స్కోర్ భిన్నంగా అనిపిస్తుంది. శ్యామ్ దత్ సినిమాటోగ్రఫీ కూడా టాప్ క్లాసే. విజువల్స్ ఆద్యంతం ఆకట్టుకుంటాయి. కొత్త నటీనటులు దర్శకుడు అని చూడకుండా ఈ కథను నమ్మి రాజీ లేకుండా నిర్మించారు మైత్రీ మూవీ మేకర్స్.

ధర్శకుడు శిష్యుడు బుచ్చిబాబు.. గురువుకు తగ్గ శిష్యుడినే అనిపించాడు. తొలి సినిమాతోనే బలమైన ముద్ర వేశాడు. రచయితగానే కాక దర్శకుడిగానూ అతను ప్రతిభ చాటుకున్నాడు. తన అనుభవాల నుంచి కథ.. పాత్రలు రాసుకున్నాడో ఏమో కానీ.. అన్నింట్లోనూ జీవం కనిపిస్తుంది. కథ రొటీన్ అనిపించినా.. దాన్ని ప్రెజెంట్ చేసిన విధానం ఆకట్టుకుంటుంది. ఒక్కో పాత్రను తీర్చిదిద్దిన తీరు మెప్పిస్తుంది. అతడి డైలాగులు సినిమాకు పెద్ద ప్లస్. క్లైమాక్స్ లో బుచ్చిబాబు అత్యుత్తమ పనితీరు కనిపిస్తుంది. ముగింపు కన్విన్సింగ్ గా చెప్పడంలో బుచ్చిబాబు ప్రతిభను కనబర్చారు.

తీర్పు:

రెగ్యూలర్ లవ్ స్టోరీ అయినా.. టేకింగ్, క్లైమాక్స్ తో ప్రేమికులను కదిలించిన ‘‘ఉప్పెన’’

చివరగా.. ప్రేక్షకులను ప్రేమ అల్లలో కట్టిపడేసిన ఉప్పెన ..!

Posted: February 12, 2021, 11:39 am
‘హిట్’

విశ్లేషణ

‘హిట్’ సినిమా ఏ రకమైన డీవియేషన్ లేకుండా.. అంతుచిక్కని ఓ మర్డర్ మిస్టరీ కేసును పాయింట్ టు పాయింట్ డీటైల్డ్ గా చదువుకుంటూ వెళ్తున్న తరహాలో నడుస్తుంది. మిస్టరీ థ్రిల్లర్లు చూసే వాళ్లకు కచ్చితంగా ‘హిట్’ మంచి అనుభూతిని కలిగిస్తుంది. మరీ చిత్ర బృందం చెప్పుకున్న స్థాయికి ఒక్క క్షణం కూడా తల తిప్పలేనంత బిగి లేదు కానీ.. ఉత్కంఠ రేకెత్తించడంలో థ్రిల్ చేయడంలోమాత్రం ‘హిట్’ విజయవంతమైంది. ‘హిట్’ సినిమాను ప్రత్యేకంగా నిలబెట్టేది ఇందులోని డీటైలింగ్. అసలేమాత్రం క్లూస్ లేని ఒక హత్య కేసును ఛేదించే క్రమంలో ఒక నిపుణుడైన పోలీస్ ఆఫీసర్ ఎలా ఆలోచిస్తాడో.. అతడి ప్లానింగ్ ఎలా ఉంటుందో.. ఎలాంటి ఎత్తుగడలు వేస్తాడో.? అని రూపోందించిన తీరు అకట్టుకుంది.

కొత్త దర్శకుడు శైలేష్ కొలను.. నిజంగానే ఒక మర్డర్ కేసును సొంతంగా డీల్ చేసి సాల్వ్ చేసిన తరహాలో తన సినిమాను తెరపై ప్రెజెంట్ చేశఆడు. ఏదో ఊహించి రాసినట్లు కాకుండా.. పరిశోధించి తెలుసుకున్న సమాచారంతో అతను స్క్రిప్టును మలిచినట్లు అనిపిస్తుంది. ఐతే కొన్ని చోట్ల డీటైలింగ్ పేరుతో మరీ లోతుగా వెళ్లిపోవడం సినిమాకు సమస్యగా కూడా మారింది. హీరో కేసును పరిశోధిస్తుండగా.. ఒక దశలో దారులన్నీ మూసుకుపోయి.. సరైన బ్రేక్ త్రూ లేక స్ట్రక్ అయిపోతాడు. అప్పుడు హీరోలోని అసహనం ప్రేక్షకుల్లోనూ కలుగుతుంది. కథ ముందుకు సాగక సినిమా కూడా కొంచెం స్ట్రక్ అయినట్లు అనిపిస్తాయి. ఐతే ద్వితీయార్ధంలోని ఈ పోర్షన్ మినహాయిస్తే ‘హిట్’ ఉత్కంఠభరితంగా సాగుతుంది.

‘హిట్’ సిన్సియర్ గా.. జానర్ కు కట్టుబడి సాగే థ్రిల్లర్ అని ఆరంభంలోనే అర్థమైపోతుంది. ఎక్కడా డీవియేషన్ లేదు. ప్రతి సన్నివేశం ప్రతి షాట్.. కథను అనుసరించే సాుతుంది. హీరో ఎంత తెలివైనవాడో చూపించే ఒక సన్నివేశంతో అతడి ఇంట్రోను సింపుల్ గా అవగొట్టేశాడు దర్శకుడు. ఆ తర్వాత హీరోకు సవాలుగా నిలవబోయే మిస్సింగ్ కేసు ఎపిసోడ్ మొదలవుతుంది. ప్రీతి అనే అమ్మాయి మిస్సవడం..  ఆ కేసును పరిశోధిస్తున్న హీరో ప్రేయసి కనిపించకుండా పోవడం.. ఈ రెండు కేసుల్ని ఛేదించేందుకు హీరో రంగంలోకి దిగడంతో కథ రసపట్టులో పడుతుంది. అక్కడి నుంచి డాక్యుమెంటరీ స్టయిల్లో సాగే పరిశోధన సన్నివేశాలు ఆసక్తి రేకెత్తిస్తాయి.

ప్రథమార్థం షార్ప్ గా ఉండి ప్రేక్షకుల్లో ఉత్కంఠ పెంచుతుంది. రెండో అర్ధంలో టెక్నికల్ విషయాల్ని మరీ లోతుగా చర్చించే సన్నివేశాలు ప్రేక్షకుల ఆసక్తిని తగ్గిస్తాయి. ఐతే అసలు గుట్టేంటో వెల్లడయ్యే ముందు హీరోకు దొరికే లీడ్స్.. ఆ తర్వాత ట్విస్టు.. కిల్లర్ నేపథ్యం.. హత్య చేయడానికి కారణాలు.. అన్నీ కూడా ప్రేక్షకులకు షాకిస్తాయి. మొత్తంగా చూస్తే థ్రిల్లర్ ప్రియులు సినిమా నుంచి సంతృప్తిగానే బయటికొస్తారు. ఐతే ఇలాంటి సినిమాలకు బాగా అలవాటు పడ్డ వాళ్లు మరీ థ్రిల్లవుతారా అన్నది డౌట్. అలాగే దర్శకుడు పూర్తిగా జానర్ కు కట్టుబడి సిన్సియర్ గా సినిమాను నడిపించిన నేపథ్యంలో కమర్షియల్ ఎలిమెంట్స్.. ఎంటర్టైన్మెంట్ కోరుకునే ప్రేక్షకులకు ‘హిట్’ ఏమేర రుచిస్తుందన్నదీ సందేహం.

నటీనటుల విషాయానికి వస్తే..

బయట విశ్వక్సేన్ ప్రవర్తించే.. మాట్లాడే తీరుకు భిన్నమైన పాత్రలో కనిపించాడు ఈ సినిమాలో. విశ్వక్సేన్ ఏంటి.. సీరియస్ పోలీసాఫీసర్ ఏంటి అనే వాళ్లను ఆశ్చర్యపరిచేలా అతను ఆ పాత్రలో ఒదిగిపోయాడు. ఈ పాత్రకు ఇతనే కరెక్ట్ అనే ఫీలింగ్ చాలా త్వరగా కలిగించి.. తనతో పాటు ట్రావెల్ అయ్యేలా చేశాడతను. ఓ చేదు గతం తనను వెంటాడుతుండగా.. సంఘర్షణకు లోనవుతూ.. ఎమోషనల్ అవుతూ కేసును డీల్ చేసే పాత్రలో విశ్వక్సేన్ నటన స్క్రీన్ ప్రెజెన్స్ గుర్తుండిపోతాయి. హీరోయిన్ రుహాని శర్మ టాలెంట్ చూపించే అవకాశం ఈ సినిమా ఇవ్వలేదు. మురళీ శర్మ.. భాను చందర్.. హరితేజ పాత్రలకు తగ్గట్లు నటించారు. నెగెటివ్ రోల్స్ చేసిన వాళ్లు ఫిట్ అనిపించారు.

{youtube}v=uYdsWe9iBAA|620|400|1{/youtube}

టెక్నికల్ అంశాలకు వస్తే..

సినిమాలో దర్శకుడు హీరో తర్వాత ఎక్కువ ఇంపాక్ట్ చూపించింది సంగీత దర్శకుడు వివేక్ సాగరే. థ్రిల్లర్ సినిమాకు పర్ఫెక్ట్ అనిపించే బ్యాగ్రౌండ్ స్కోర్ తో అతను ఆకట్టుకున్నాడు. రెగ్యులర్ గా తెలుగు సినిమాల్లో వినిపించే వాటికి భిన్నమైన శబ్దాలతో అతను తన పనితనం చూపించాడు. కొన్నిచోట్ల లౌడ్ అనిపించినా ఓవరాల్ గా బ్యాగ్రౌండ్ స్కోర్ ఆకట్టుకుంటుంది. మణికందన్ ఛాయాగ్రహణం కూడా సినిమాలోని ఇంటెన్సిటీని చూపించడానికి తోడ్పడింది.

నిర్మాణ విలువలు బాగున్నాయి. దర్శకుడు శైలేష్ కొలనుకు థ్రిల్లర్ జానర్ మీద పట్టుందని సినిమా చూస్తే అర్థమవుతుంది. అతను మర్డర్ మిస్టరీ కేసుల్ని బాగా పరిశోధించి సినిమా తీశాడనిపిస్తుంది. అతడి డీటైలింగ్ బాగుంది. టెక్నికల్ విషయాలపై బాగా పట్టున్నట్లు కనిపిస్తుంది. మధ్యలో కొంత డీవియేట్ అయినట్లు అనిపించినా.. ఓవరాల్ గా తన ‘ఫస్ట్ కేస్’ను అతను బాగానే డీల్ చేశాడు.

తీర్పు..

కమర్షియల్ ఎలిమెంట్స్ లేని.. పక్కా సస్పెన్స్ థ్రిల్లర్.. ఈ తరహా కథా ప్రేమికులకు గుడ్ చిల్లర్.. ‘‘హిట్’’

చివరగా... ప్రేక్షకులను కట్టిపడేసి సస్పెన్స్ థ్రిల్లర్.. ..!

Posted: February 28, 2020, 2:42 pm
‘భీష్మ’

విశ్లేషణ

ఎక్కడా డీవియేట్‌ కాకుండా, అనవసర హంగుల విషయాలకు వెళ్లకుండా దర్శకుడు వెంకీ కుడుముల చాలా జాగ్రత్తగా, పద్దతిగా ఈ చిత్రాన్ని తెరకెక్కించాడు. అతడు చెప్పాలనుకున్న పాయింట్‌ను పక్కాగా తెరపై ప్రజెంట్‌ చేశాడు. ఈ విషయంలో అతడికి నూటికి నూరు మార్కులు పడతాయి. సేంద్రీయ వ్యవ‌సాయం అనే నేప‌థ్యం మినహా క‌థ సాధార‌ణ‌మైన‌దే. కానీ ఆ క‌థ‌కే త‌గిన‌న్ని మ‌లుపులు, సంద‌ర్భోచితంగా పండే హాస్యాన్ని జోడించి చిత్రాన్ని తీర్చిదిద్దారు. క‌థ చూసిందే క‌దా అనే విష‌యాన్ని కూడా గుర్తురానీయ‌కుండా త‌ర‌చూ న‌వ్విస్తుంటాయి పాత్రలు. ద‌ర్శకుడు త‌న తొలి సినిమాతోనే క‌థ‌లో హాస్యాన్ని మేళ‌వించ‌డంపై త‌న‌కి మంచి ప‌ట్టుంద‌ని నిరూపించారు.

మ‌రోసారి త‌న బ‌లాన్నే వాడుకుని చిత్రాన్ని తీర్చిదిద్దాడు. అనంత్‌ నాగ్‌ ఆర్గానిక్‌ వ్యవసాయం గొప్పతనం గురించి చెప్పే స్పీచ్‌తో సినిమా ఆరంభం అవుతుంది. వెంటనే హీరో సాదాసీదా ఎంట్రీ ఇస్తాడు. ఆ తర్వాత ఎంటర్‌టైన్‌మెంట్‌ ఎక్కడ తగ్గకుండా, కథ పక్కదారి పట్టకుండా సినిమా సాగుతుంది. హీరోయిన్‌ ఎంట్రీ, వెన్నెల కిశోర్‌, సంపత్‌, నరేశ్‌, నితిన్‌, బ్రహ్మాజీల కామెడీ, నితిన్‌, రష్మికల మధ్య వచ్చే సీన్లతో ఫస్టాఫ్‌ సాఫీగా సాగుతుంది. ఇంటర్వెల్‌కు ముందు వచ్చే ట్విస్ట్‌ అదిరిపోతుంది. ద్వితీయార్థంలో కొన్నిచోట్ల సాగ‌దీత‌లా అనిపించినా.. అది హాస్యానికి బ్రేక్ అనిపిస్తోందే తప్ప మరీ బోర్ అనిపించదు. హీరో పాత్ర స‌గ‌టు తెలుగు సినిమాల్లోలాగే ఉంటుంది. ఆరంభ స‌న్నివేశాలు సాధార‌ణంగానే అనిపిస్తాయి.

ఇక సెకండాఫ్‌ కామెడీతోనే మొదలవుతుంది. ఆ తర్వాత అనూహ్య మలుపులు తిరుగుతుంది. ట్విస్టుల మీద ట్విస్టులు రివీల్‌ అవుతాయి. ముఖ్యంగా రెండో అర్థభాగం ఆర్గానికి వ్యవసాయం చుట్టూ తిరుగుతున్నా ఎక్కడా బోర్‌ కొట్టదు. వ్యవసాయానికి శృతి మించని ఎంటర్‌టైన్‌మెంట్‌ జోడించడం బాగుంటుంది. ఇక కొన్ని పంచ్‌ డైలాగ్‌లు వావ్‌ అనిపించేలా ఉంటాయి. ఇక ఈ సినిమాలో హీరో అంతగా చదువుకోలేదు.. డబ్బులు ఉన్నవాడు కాదు.. కానీ అనుకున్నది సాధిస్తాడు. ఎంతో మందికి ఆదర్శంగా నిలుస్తాడు. ఆశయం గొప్పదయితే ప్రకృతే మనకు అదృష్టంగా మారి మన విజయానికి సహకరిస్తుందని ‘భీష్మ’ సినిమాతో మరోసారి రుజువైంది.

నటీనటుల విషాయానికి వస్తే..

భీష్మ సినిమాలో మన పక్కింటి కుర్రాడిలా కనిపించాడు హీరో నితిన్. ఆయన లుక్, మేకింగ్ విషయంలో గత చిత్రాల స్టైల్లోనే కనపడ్డాడు. సందర్భానుసారం వచ్చే కామెడీ సన్నివేశాల్లో నితిన్ చక్కగా నటించాడు. ముఖ్యంగా మీమ్స్ డైలాగ్స్ చెప్పే సీన్స్, వెన్నెలకిషోర్ కామెడీ..రఘుబాబు కామెడీ ఆకట్టుకుంటుంది. రష్మికతో లవ్ సీన్స్‌లోనూ నితిన్ నటన ఆకట్టుకుంటుంది. ఇక రష్మిక విషయానికి వస్తే.. తను పాత్ర పరిధి మేరకు చక్కగా నటించింది.

ముఖ్యంగా వాట్టే బేబీ పాటలో.. తన నటన ఆకట్టుకుంటుంది. సంపత్, నరేశ్, బ్రహ్మాజీ తదితరులు వారి పాత్రల మేరకు చక్కగా నటించారు. సంపత్ క్యారెక్టర్‌ను చూపించినంత సీరియస్‌గా క్యారీ చేయకుండా కమర్షియల్ సినిమాలో కామెడీ చేసేసినట్టు చేసేశారు. ఇక సినిమాలో కమర్షియల్ కామెడీని పండించడంలో వెన్నెల కిషోర్ తనదైన పాత్రను పోషించాడు. వాస్తవానికి దూరంగా ఉండే ఈ పాత్రలో వెన్నెల కిషోర్ తనదైన నటనతో ప్రేక్షకులను మెప్పించాడు. అయితే ప్రతినాయకుడి పాత్రకు బలం లేకపోవడమే కొంత మైనస్ గా నిలుస్తోంది.

{youtube}v=8A9mJYprMl4|620|400|1{/youtube}

టెక్నికల్ అంశాలకు వస్తే..

మ్యూజిక్‌ డైరెక్టర్‌ మహతి స్వర సాగర్‌ అందించిన సంగీతం చిత్రానికి బలాన్ని అందించింది. ఈ సినిమా పాటలు ఎంతటి హిట్‌ సాధించాయే ప్రత్యేకంగా చెప్పక్కర్లేదు. సాగర్ మహతి సంగీతంలో వాట్టే బేబీ... సాంగ్ అందులో నితిన్, రష్మిక డాన్స్ చాలా బావున్నాయి. ఇక బ్యాగ్రౌండ్‌ మ్యూజిక్‌ ఆకట్టుకుంటుంది. సింగర్స్‌, లిరక్‌ రైటర్స్‌ తమ వంతు న్యాయం చేశారు. స్క్రీన్‌ప్లే గజిబిజీగా కాకుండా క్లీన్ గా సాగుతుంది. సినిమాటోగ్రఫీ చాలా బాగుంది. సాయి శ్రీరామ్‌ తన కెమెరా పనితనంతో సినిమాను చాలా రిచ్ గా చూపించారు. నవీన్ నూలీ ఎడిటింగ్‌ బాగుంది.

సాంకేతికంగా సినిమా ఉన్నతంగా ఉంది. నిర్మాణ విలువలు సినిమాకు తగ్గట్టు ఉన్నాయి. ఎక్కడా కూడా వెనక్కితగ్గకుండా.. నిర్మాత నాగవంశీ ఖర్చు చేసినట్టు సినిమా చూస్తే అర్థమవుతుంది. ఫైనల్ గా చెప్పాలంటే.. దర్శకుడి ప్రతిభ, ఆకట్టుకునే నటీనటులు నటన, అలరించే సంగీతం ఇలా అన్నీ కలబోసి వచ్చిన చిత్రం ‘భీష్మ’. కమర్షియల్ పంథాలో సినిమాను ఆసాంతం ఎంటర్‌టైనింగ్‌గా తెరకెక్కించే ప్రయత్నం చేశాడు. పక్కా కమర్షియల్‌ ఎంటర్‌టైనర్‌.. నితిన్ కెరీర్ లో ఈ చిత్రం మరో మైలురాయిగా నిలుస్తుంది.

తీర్పు..

భీష్మడు అధృష్టవంతుడని చాటుతున్న రెగ్యూలర్ కమర్షియల్.. ‘‘ పక్కా పైసా వసూల్ చిత్రం’’

చివరగా... రోమాన్స్, కామెడీ, యాక్షన్ కలగలిపిన సందేశాత్మక చిత్రం..!

Posted: February 21, 2020, 11:52 am
‘జాను’

విశ్లేషణ

ప్రేమ‌క‌థ‌లు ఎక్కువగా యువతకే న‌చ్చుతుంటాయి. తెర‌పై క‌నిపించే పాత్రలతో క‌నెక్ట్ అయ్యేది వాళ్లు మాత్రమే. కొన్ని ప్రేమ‌ క‌థ‌లు మాత్రం అన్ని వ‌య‌స్సల వారిని హత్తుకునేలా వుంటాయి. అలాంటి ప్రేమ‌క‌థే.. ‘జాను’. తొలి ప్రేమలోని మ‌ధురానుభూతుల్ని పంచే చిత్రమిది. చిన్ననాటి జ్ఞాప‌కాల్ని గుర్తు చేస్తూ, గ‌డిచిపోయిన జీవితంలోకి మ‌రోసారి తీసుకెళుతుంది. నిన్నటి నువ్వు ఇదే అంటూ మ‌రోసారి మ‌న‌ల్ని మ‌న‌కు ప‌రిచ‌యం చేస్తుంది. రీమేక్ సినిమా అంటే క‌చ్చితంగా మాతృక‌తో పోల్చి చూస్తుంటారు. మాతృక త‌ర‌హాలోనే రీమేక్ లోనూ మ్యాజిక్ చేసే క‌థ‌లు కొన్ని మాత్రమే ఉంటాయి. అందులో ఇదొక‌టి.

చిన్ననాటి స్నేహితుల మ‌ధ్య ఉన్నామంటే ఆ వాతావ‌ర‌ణం ఎంత స‌ర‌దాగా ఉంటుందో చూపిస్తూ.. ఆ నేప‌థ్యంలో న‌వ్విస్తూ.. తొలి ప్రేమ చేసిన తీపి గాయాల‌తో హృద‌యాల్ని బ‌రువెక్కిస్తూ ముందుకు సాగుతుందీ చిత్రం. క‌థానాయ‌కుడు త‌న స్కూల్ లోకి అడుగు పెట్టిన‌ప్పట్నుంచే సినిమా భావోద్వేగ‌భ‌రితంగా మారిపోతుంది. అర్జెంటుగా బ‌య‌టికెళ్లి మ‌న స్కూల్ ని ఒక‌సారి చూసొద్దాం అనిపించేలా ప్రేక్షకుడిని ప్రభావితం చేస్తుంది. అంతలా ఈ చిత్రాన్ని ప్రేక్షకులకు దగ్గరగా రూపోందించాడు దర్శకుడు.

పూర్వ విద్యార్థుల అలుమ్నీ కోసం వాట్సాప్ గ్రూప్ క్రియేట్ చేయ‌డం, అందులో ఒకొక్కరు ఒక్కో ర‌కంగా స్పందించ‌డం, అంద‌రూ ఒక చోట క‌ల‌వ‌డం, అక్కడ వాతావ‌ర‌ణం స‌ర‌దాగా మారిపోవ‌డం లాంటి స‌న్నివేశాల‌తో సినిమా చ‌క్కటి వినోదాన్ని పంచుతుంది. ఇక రామ్‌, జానుల ప్రేమ‌క‌థ తొలిప్రేమ రోజుల్లోకి తీసుకెళ్తోంది. విరామం స‌మ‌యంలో వ‌చ్చే స‌న్నివేశాలు హృద‌యాల్ని బ‌రువెక్కిస్తాయి. రామ్ గురించి ఒక విష‌యం తెలిశాక జాను భావోద్వేగానికి గుర‌య్యే తీరు సినిమాకి ప్రధాన ఆక‌ర్షణ‌గా నిలుస్తుంది.

ఇక ద్వితీయార్ధంలో భావోద్వేగాలు మరింతగా పండాయి. రామ్‌, జాను క‌లిసి ఒక రోజు రాత్రి చేసే ప్రయాణం.. అక్కడ జాను గురించి రామ్ తెలుసుకున్న విష‌యాల గురించి చెప్పడం, రామ్ స్టూడెంట్స్ ద‌గ్గర జాను చెప్పిన ప్రేమ‌క‌థ‌, ఆ నేప‌థ్యంలో భావోద్వేగాలు మ‌నసుల్ని హ‌త్తుకుంటాయి. క‌థ‌లోనే బ‌లం ఉండ‌టంతో, మాతృక‌తో పోల్చి చూసుకున్నా.. దేని మ్యాజిక్ దానిదే అనే భావ‌న‌కి గురిచేసే చిత్రమిది. అక్కడ‌క్కడా స‌న్నివేశాలు నిదానంగా సాగ‌డం కాస్త ఇబ్బందిగా అనిపిస్తుంది. శ‌ర్వానంద్, స‌మంత పాత్రల‌కి ప్రాణం పోశారు. వాళ్ల ఎంపిక వంద‌శాతం స‌రైన‌ద‌నిపిస్తుందీ చిత్రం.

నటీనటుల విషాయానికి వస్తే..

రామ్ పాత్ర‌లో శ‌ర్వా.. జానకి పాత్ర‌లో స‌మంత ఒదిగిపోయారు. చ‌క్క‌గా ఫీల్‌ను క్యారీ చేశారు. ప‌ద‌వ త‌ర‌గ‌తిలో పుట్టిన ప్రేమ.. అనుకోని ప‌రిస్థితుల్లో విడిపోవ‌డం.. 17 ఏళ్ల త‌ర్వాత క‌లుసుకున్న‌ప్పుడు వారి ఫీలింగ్స్ ఎలా ఉంటాయ‌నేదే ఈ సినిమా. ఆ ఫీలింగ్స్‌ను శ‌ర్వా, స‌మంత చ‌క్క‌గా తెర‌పై ఆవిష్క‌రించారు. శ‌ర్వా, స‌మంత‌ల న‌ట‌నే చిత్రానికి ప్రధాన బ‌లం. శ‌ర్వా, స‌మంత‌లు త‌మ అనుభ‌వాన్నంతా రంగరించి నాలుగు గోడ‌ల మ‌ధ్య‌, రెండు పాత్రల మ‌ధ్యే సాగే స‌న్నివేశాల్ని ర‌క్తిక‌ట్టించ‌ారు. ఇక వెన్నెల‌ కిషోర్‌, తాగుబోతు ర‌మేష్‌, త‌నికెళ్ల భ‌ర‌ణి, ర‌ఘుబాబుతో పాటు జూనియ‌ర్ శ‌ర్వానంద్‌గా న‌టించిన సాయికిర‌ణ్‌, జూనియ‌ర్ స‌మంత‌గా న‌టించిన గౌరి చ‌క్క‌గా న‌టించారు.

{youtube}v=8sWRT2hGPcQ|620|400|1{/youtube}

టెక్నికల్ అంశాలకు వస్తే..

సాంకేతికంగా సినిమా చాలా బాగుంది. నిర్మాణ విలువలకు ఢోకా లేదు. సినిమాను చాలా రిచ్ గా రూపోందించారు. సినిమా మేకింగ్ విష‌యానికి వ‌స్తే మ‌హేంద్ర‌న్ జైరాజ్ సినిమాటోగ్ర‌ఫీ చాలా బావుంది. ఇక ఇలాంటి ప్రేమకథా చిత్రాలకు సంగీత‌మే ప్ర‌ధాన బ‌లం. గోవింద్ వ‌సంత సంగీతం, బ్యాగ్రౌండ్ స్కోర్ సన్నివేశాల‌ను మ‌రో రేంజ్‌లో నిలిపాయి. ఇక దీనికి తోడు మిర్చికిర‌ణ్ మాట‌లు మెప్పిస్తాయి. సినిమాలో చాలా స్లో నెరేష‌న్‌లో కొన‌సాగుతుంది. ప్రేమ్‌కుమార్ భావోద్వేగాల‌పై ప‌ట్టు కోల్పోకుండా క‌థ‌ని న‌డిపించిన విధానం మెప్పిస్తుంది. దిల్‌రాజు చేసిన తొలి రీమేక్ సినిమా ఇది. ఆయ‌న సంస్థ స్థాయికి త‌గ్గట్టుగా నిర్మాణ విలువ‌లు ఉన్నాయి.

తీర్పు..

ప్రేమ‌లో గాయపడిన హృదయాలకు.. తొలిప్రేమలో మధురజ్ఞాపకాలను మరోమారు ఆవిష్కరించే ల‌వ్ ఎమోష‌న్స్ మూవీ..! జాను..!!

చివరగా.. మ‌న‌సుల్ని హ‌త్తుకునే.. ‘జాను’..!

Posted: February 7, 2020, 2:39 pm
‘డిస్కోరాజా’

విశ్లేషణ

డిస్కోరాజా..డిస్కో మ్యూజిక్‌ను ఇష్ట‌ప‌డే రాజా అనే ఓ గ్యాంగ్‌స్ట‌ర్ క‌థ. సింపుల్‌గా చెప్పాలంటే ఇదే సినిమా లైన్‌. రెగ్యుల‌ర్ క‌మ‌ర్షియ‌ల్ మూవీ. నాన్న ర‌వితేజ చ‌నిపోవడం.. అత‌నికి కొడుకు ర‌వితేజ ఉండ‌టం. అత‌నిపై ప‌గ సాధించ‌డానికి వ‌చ్చిన విల‌న్స్ భ‌ర‌తం ఎలా ప‌ట్టార‌నేది మూల క‌థ‌. అయితే దీనికి తండ్రి పాత్ర‌లో1980 బ్యాక్‌డ్రాప్‌లో కాస్త ట‌చింగ్ ఇవ్వ‌డం . కొడుకు పాత్ర‌ను అనాథ చూపించి అత‌ని చుట్టూ క‌థ‌ను న‌డ‌ప‌డం. చివ‌ర‌కు తండ్రే అస‌లు త‌న వెనుక క‌థ ఏం జ‌రిగిందో తెలుసుకునే క్ర‌మంలో న‌డిచే సినిమా.

ఇక సినిమాను న‌డిపించే మెయిన్ పాత్ర డిస్కోరాజాది. ఈ పాత్ర‌తో పాటు అత‌ని కొడుకు పాత్ర‌ను ర‌వితేజ క్యారీ చేశాడు. తండ్రి పాత్ర‌.. కొడుకు పాత్ర ఒకే ఏజ్‌లో ఉండే కాన్సెప్ట్ ఉండే సినిమా కావ‌డంతో ర‌వితేజ‌ను ఎక్క‌డా ఏజ్ డిఫ‌రెన్స్ చూపించాల్సిన అవ‌స‌రం లేకుండా పోయింది. ఆ విష‌యంలో డైరెక్ట‌ర్ వి.ఐ.ఆనంద్‌ను అభినందించాలి. ఈ రెండు పాత్ర‌ల‌కు ఉన్న క‌మ‌ర్షియ‌ల్ ట‌చ్‌.. కొత్త‌ద‌నం లేని పాత్రలు కావ‌డంతో ర‌వితేజ రెండు పాత్ర‌ల‌ను త‌న‌దైన స్టైల్లో చేసేశాడు. లుక్ ప‌రంగా యంగ్‌గా క‌నిపించి ఆక‌ట్టుకున్నాడు.
 
వాసు అనే పాత్ర కంటే డిస్కోరాజ పాత్ర‌కున్న ప్రాధాన్య‌త ఎక్కువ‌. 1980 బ్యాక్‌డ్రాప్‌లో సాగే ఈ పాత్ర‌లో ర‌వితేజ లుక్ అప్ప‌టి రెట్రో లుక్‌ను పోలి ఉంది. ర‌వితేజ రెట్రో లుక్ మిన‌హా సినిమాలో చెప్పుకోద‌గ్గ ఎలిమెంట్స్ లేవు. హీరో డాన్‌గా ఎదిగడం.. అత‌ని ఓ శ‌త్రువు ఉండ‌టం.. మ‌రో క‌న‌ప‌డ‌ని శత్రువు ఉండ‌టం కామ‌న్‌గా ఇత‌ర సినిమాల్లో ఉన్న‌ట్లే ఉంది. డిస్కోరాజా గ్యాంగ్‌స్ట‌ర్‌గా ఎదిగే క్ర‌మంలో బ్యాంకు దొంగ‌త‌నం కామెడీగా అనిపిస్తుంది. బ్యాంకును దొంగ‌తనం చేసిన దెవ‌రో తెలిసినా పోలీసులు ఆల‌స్యంగా వ‌స్తారు.

ఇక డాన్‌గా ఎదిగే క్ర‌మంలో ర‌వితేజ‌ను ప్లేబోయ్‌గా చూపించే ప్ర‌య‌త్నం చేశాడు ద‌ర్శ‌కుడు. అత‌ను మాట‌లు రాని.. విన‌ప‌డ‌ని హీరోయిన్‌ను ప్రేమించ‌డం ఆమె ప్రేమ‌కోసం గ్యాంగ్‌స్ట‌ర్ క‌నుమ‌రుగై కొత్త జీవితాన్ని ప్రారంభించాల‌నుకుంటాడు. ఆ క్ర‌మంలో అత‌నిపై దాడి జ‌ర‌గ‌డం. రొటీన్ క‌మ‌ర్షియ‌ల్ సినిమా. ఈ విష‌యాలు తెలియ‌ని కొడుకు ర‌వితేజ.. తండ్రిని చంపాల‌నుకోవ‌డం.. కానీ నిజం తెలుసుకుని మెయిన్ విల‌న్ ద‌గ్గ‌ర‌కు వెళ్లడం అత‌న్ని చంపేస్తారు. కానీ ఇక్క‌డ అస‌లు ట్విస్టు. అస‌లు హీరో క‌ష్టాల‌కు కార‌ణ‌మైన విల‌న్ మ‌రొక‌డుంటాడు. అత‌న్ని చంప‌డంతో సినిమా ముగుస్తుంది.

నటీనటుల విషాయానికి వస్తే..

ర‌వితేజ వ‌న్ మేన్ షో అని చెప్పొచ్చు. ఆయ‌న పాత్రలో ప‌లు కోణాలు క‌నిపిస్తాయి. వాట‌న్నింట్లోనూ చ‌క్కగా ఒదిగిపోయాడు. డాన్‌గా, వాసు అనే ఒక సాధార‌ణ యువ‌కుడిగా చాలా బాగా న‌టించాడు. ప్రథమార్ధంలో వెన్నెల కిషోర్‌, తాన్య హోప్ త‌దిత‌ర కామెడీ గ్యాంగ్‌తో క‌లిసి బాగా న‌వ్వించాడు. ద్వితీయార్ధంలో డిస్కోరాజ్‌గా క‌నిపించిన విధానం ఇంకా బాగుంటుంది. బాబీ సింహా న‌ట‌న చిత్రానికి ప్రధాన‌ బ‌లం. బ‌ర్మా సేతుగా ఆయ‌న పాత్రకి ప్రాణం పోశాడు. విల‌నిజం బాగా పండింది. సునీల్ న‌ట‌న, ఆయ‌న పాత్రని తీర్చిదిద్దిన విధానం సినిమాకి ప్రధాన ఆక‌ర్షణ‌. పాయ‌ల్ రాజ్‌పుత్ మాట‌లు కూడా లేకుండా హెలెన్‌గా చ‌క్కటి అభిన‌యం ప్రద‌ర్శించింది. అందంతోనూ, పాత‌కాలంనాటి లుక్‌తోనూ క‌ట్టిపడేస్తుందామె. పాయ‌ల్ రాజ్‌పుత్ పాత్ర జ‌స్ట్ ఓకే. ఓపాట మ‌రికొన్ని సీన్స్‌తో త‌న పాత్ర‌ను ప‌రిమితం చేశారు. కానీ త‌న‌కు ఈ పాత్ర పెద్ద బ్రేక్ ఇవ్వ‌దని సినిమా చూస్తే క‌చ్చితంగా అర్థ‌మ‌వుతుంది. ఇక తాన్యా హోప్ పాత్ర గురించి ఎంత త‌క్కువ‌గా చెప్పుకుంటే అంత బెట‌ర్‌. ఇక రాంకీ, స‌త్య‌, సునీల్‌, ర‌ఘుబాబు, భ‌ర‌త్‌, వెన్నెల‌కిషోర్ త‌దిత‌రులు వారి వారి పాత్ర‌ల ప‌రిధి మేర చ‌క్క‌గా న‌టించారు.

{youtube}v=PDky1zSO7N8|620|400|1{/youtube}

టెక్నికల్ అంశాలకు వస్తే..

సాంకేతిక విభాగం మంచి ప‌నితీరుని క‌న‌బ‌రిచింది. కార్తీక్ ఘ‌ట్టమ‌నేని కెమెరా ప‌నిత‌నం మెప్పిస్తుంది. ఫ్లాష్ బ్యాక్ స‌న్నివేశాలను, లద్దాఖ్‌  నేప‌థ్యాన్ని చాలా బాగా చూపించారు. త‌మ‌న్ సంగీతం సినిమాకి మ‌రింత బ‌లాన్నిచ్చింది. `నువ్వు నాతో ఏమ‌న్నావో ...` పాట మాత్ర‌మే విన‌డానికి బావుంది. పాట‌లు చూడటానికి గొప్ప‌గా ఏవీ లేవు. బ్యాగ్రౌండ్ స్కోర్ఓకే. ఎడిట‌ర్ మాత్రం సెకండాఫ్‌లో మ‌రో ప‌దిహేను నిమిషాలు క‌త్తెర‌కు ప‌ని చెప్పి ఉండాల్సింది.ఇత‌ర విభాగాలు కూడా స‌మ‌ష్టిగా ప‌నిచేశాయి. ద‌ర్శకుడు వి.ఐ.ఆనంద్ ఒక కొత్త నేప‌థ్యంలో క‌థ‌ని రాసుకున్న విధానం బాగుంది నిర్మాణ విలువ‌లు ఉన్నతంగా ఉన్నాయి.

తీర్పు..

డిస్కోరాజా.. కాస్త 1980 బ్యాక్ డ్రాప్‌తో సాగే సాధార‌ణ క‌మ‌ర్షియ‌ల్ డ్రామా..! వెతికినా దొరకని సైన్స్ ఫిక్షన్.!!

చివరగా.. సగటు ప్రేక్షకులకు బోరింగ్ రాజా..!..!

Posted: January 24, 2020, 3:20 pm
‘సరిలేరు నీకెవ్వరు’

విశ్లేషణ

మాస్‌ ఎంటర్ టైనర్ సరిలేరు నీకెవ్వరు చిత్రంలో మహేశ్‌బాబు తన అభిమానులకు ఫుల్ మీల్స్ బోజనం వడ్డించాడు. సగటు అభిమాని ఏం కోరుకుంటాడో అవన్నీ రంగరించి తయారు చేసుకున్న కథలా అనిపిస్తుంది. ఆర్మీ అధికారి అజయ్ కృష్ణ పాత్రలో మహేశ్‌ లుక్‌, యాక్షన్‌ అదిరిపోయింది. అదే సమయంలో ప్రొఫెసర్‌ భారతిని కాపాడే వ్యక్తిగా రెండు పాత్రల్లో వేరియేషన్స్‌ చూపించాడు. ఆర్మీ నేపథ్యంతో సినిమాను మొదలు పెట్టిన దర్శకుడు నెమ్మదిగా కథలోకి తీసుకెళ్లే ప్రయత్నం చేశాడు.

ఆర్మీ మేజర్ గా ఉగ్రవాదుల నుంచి మహేశ్ బాబు విద్యార్థులను కాపాడే సన్నివేశాలు ఆకట్టుకున్నాయి. అప్పటివరకు సీరియస్ గా వున్న కథ అజయ్ కర్నూలు ప్రయాణంతో కామెడీ ట్రాక్ ఎంట్రీ ఇస్తోంది. రైలులో రష్మిక, సంగీత, రావు రమేష్‌, బండ్ల గణేశ్‌ తదితర పాత్రలు ప్రవేశించడంతో సినిమా ఆసక్తికరంగా మారుతుంది. రైలులో జరిగే సన్నివేశాలన్నీ ప్రేక్షకులకు కడుపుబ్బా నవ్విస్తాయి. అజయ్ ను ప్రేమించే అమ్మాయిగా రష్మిక నటన, మేనరిజం.. బ్లేడ్‌ గ్యాంగ్‌గా బండ్ల గణేష్‌ హంగామాతో ప్రథమార్ధం కితకితలు పెట్టిస్తుంది.

రైలు కర్నూలు చేరుకున్న తరువాత కథ మళ్లీ సీరియస్ ట్రాక్ లో రన్ అవుతుంది. ఇక్కడి నుంచి అజయ్, భారతి-నాగేంద్ర ప్రసాద్‌ మధ్య పోరు మొదలవుతుంది. ఒక హత్య కేసు కోసం భారతి పోరాటం చేయడం, ఆమె కుటుంబంపై నాగేంద్ర ప్రసాద్‌ కక్ష సాధించడం, విషయం తెలిసిన అజయ్‌ ఆ చర్యలను అడ్డుకోవడం ఇలా సన్నివేశాలన్నీ ఒకదానితో ఒకటి ముడిపడి ఉంటాయి. మహేశ్‌-విజయశాంతి-ప్రకాష్‌రాజ్‌ ఒకరితో మరొకరు పోటీ పడి మరీ నటించారు. ప్రథమార్ధంలో కామెడీకి అధిక ప్రాధాన్యం ఇచ్చిన దర్శకుడు ద్వితీయార్ధంలో కథనం సీరియస్ గా నడిపించాడు.

అయితే క్రైమ్‌ బ్రాంచ్‌ కోటిగా సుబ్బరాజు, కిషోర్ లతో కామెడీని రన్ చేశాడు. రాజకీయ నాయకులను బంధించి మహేశ్ బాబు చెప్పే పిట్ట కథ, వాళ్లను భయపెట్టడానికి బాంబు పెట్టడం తదితర సన్నివేశాలు సరదాగా ఉంటాయి. ఇక విజయశాంతి-మహేశ్ బాబుల మధ్య ఆర్మీ గొప్పదనం గురించి సన్నివేశాలు ఉద్విగ్నతకు గురి చేస్తాయి. ఆ సన్నివేశాల్లో నేపథ్య సంగీతం ఒళ్లు గగురుపొడిచేలా చేస్తుంది. ముఖ్యంగా మహేశ్‌ కర్నూలు వచ్చిన కారణాన్ని చెప్పే సన్నివేశంలో భావోద్వేగాలు అద్భుతంగా పండాయి.

అయితే ఎఫ్ 2 మాదిరిగానే ఈ చిత్రం కూడా ప్రథమార్థం ఎంతో ఆసక్తిగా సాగినా.. ద్వితీయార్థంలో కొంత సాగదీత వుందనిపిస్తోంది. అయితే, కథ సీరియస్ గా సాగుతూనే మహేశ్‌ కామెడీ టైమింగ్‌ అలరిస్తుంది. ముఖ్యంగా యాక్షన్‌ సన్నివేశాల సమయంలోనూ మహేశ్‌ పంచ్ లు, ప్రాసలు అభిమానులను ఆకట్టుకుంటాయి. ఇక సూపర్ స్టార్ కృష్ణ వెండితెరపై తళుక్కున మెరుస్తారు. ఆయన మెరుపులను వెండితెరపై చూడాల్సిందే. అయితే చిత్రంలో కొన్ని సన్నివేశాలకు ఇంకాస్త కత్తెర పడితే బాగుండు అనిపించిక మానదు.. ఇక రోటిన్ కు బిన్నంగా సాగే క్లైమాక్స్ కూడా అభిమానుల అంచనాలకు దూరంగా వుంది.

నటీనటుల విషాయానికి వస్తే..

మహేష్ కెరీర్ మొత్తంలో అత్యంత ఉత్సాహభరితమైన పాత్రల్లో ‘సరిలేరు నీకెవ్వరు’లోని అజయ్ క్యారెక్టర్ ఒకటిగా నిలుస్తుందనడంలో సందేహం లేదు. మహేష్ ఫ్యాన్స్ తో పాటు మిగతా ప్రేక్షకులు కూడా ప్రిన్స్ ను ఇలాంటి పాత్రలో చూసి ఇష్టపడతారు. అంత ఎనర్జిటిగ్గా.. సరదాగా సాగుతుంది మహేష్ పాత్ర. సిగ్నేచర్ మేనరిజం, స్టయిల్ రాయలసీమ యాస, కామెడీ టైమింగ్ అన్నింట్లో మహేష్ అదరగోట్టాడు. డ్యాన్సింగ్ స్కిల్స్ ను కూడా ప్రదర్శించాడు. ముఖ్యంగా ‘మైండ్ బ్లాంక్’ పాటలో మహేష్ స్టెప్పులు అభిమానుల్ని ఉర్రూతలూగిస్తాయి. ఓవరాల్ గా మహేష్ తన అభిమానులకైతే కనువిందు చేసేశాడు.

హీరోయిన్ రష్మిక మందన్నా పాత్ర చాలా సాధారణంగా అనిపిస్తుంది. ఆమె ఉత్సాహంగానే నటించినా.. పాత్ర మరీ సిల్లీగా అనిపిస్తుంది. లుక్స్ పరంగా మహేష్ ముందు ఆమె తేలిపోయింది. కొన్ని సన్నివేశాల్లో మరీ రెచ్చిపోయిందిరో అనిపించేలా వుంది. దాదాపు 13 ఏళ్ల తరువాత రీఎంట్రీ ఇచ్చిన విజయశాంతి.. తన హుందా తనంలో చిత్రానికి వెన్నె తీసుకువచ్చింది. మెడికల్ కాలేజీ ఫ్రోఫెసర్ గా తన ప్రత్యేకత చాటుకుంది. సైనికుల గొప్పదనం గురించి చెప్పే సన్నివేశంలో విజయశాంతి నట కౌశలం కనిపిస్తుంది.

ప్రకాష్ రాజ్ గురించి చెప్పడానికేమీ లేదు. సహజంగా పాత్రలోకి పరకాయ ప్రవేశం చేసే ఆయన ఈ చిత్రంలో మంత్రి నాగేంద్ర ప్రసాద్‌గా ప్రేక్షకులను మెప్పించారు. ముఖ్యంగా మహేశ్‌-ప్రకాష్ రాజ్ ల మధ్య వచ్చే సన్నివేశాల్లో ఇద్దరూ పోటాపోటీగా నటించారు. రావు రమేష్ రాజేంద్ర ప్రసాద్ వెన్నెల కిషోర్ సత్యదేవ్ మురళీ శర్మ చాలా మామూలు పాత్రలు ధరించినా వారి పాత్రపరిధి మేరకు వారు బాగా నటించారు. జయప్రకాష్ రెడ్డి.. అజయ్.. సంగీత పర్వాలేదు.

{youtube}v=Pim3CUGCXbY|620|400|1{/youtube}

టెక్నికల్ అంశాలకు వస్తే..

దేవిశ్రీ ప్రసాద్ పాటలు, సంగీతం, ఆర్మీ గొప్పదనం సన్నివేశంలో వినిపించే బ్యాక్ గ్రౌండ్ స్కోరింగ్ అదిరింది. పాటలు దృశ్యపరంగా ఆకట్టుకునేలా వున్నాయి. శేఖర్ మాస్టార్ కొరియోగ్రఫీకి మార్కులు పడ్డాయి. డాంగ్ డాంగ్.. మైండ్ బ్లాక్ పాటలతో పాటు దేశభక్తి గీతానిని అందించిన మ్యూజిక్ హాట్సాఫ్. రత్నవేలు ఛాయాగ్రహణం చాలా బాగుంది. పిల్లల కిడ్నాప్, బాంబు పేలుడు సన్నివేశాల్లో ఛాయాగ్రహనం ఆకట్టుకుంది. వీటితో పాటు కశ్మీర్ ఎపిసోడ్లో.. కొండారెడ్డి బురుజు యాక్షన్ సీన్లో విజువల్స్ సూపర్బ్.

నిర్మాణ విలువలకు ఢోకా లేదు. సినిమా చాలా రిచ్ గా తెరకెక్కింది. దర్శకుడిగా అనిల్ రావిపూడి తన ప్రత్యేకతను రోటీన్ చిత్రాల కథ తరహాలోనే తీసినా.. సూపర్ స్టార్ ఇమేజ్.. అభిమానులు కోరుకునే మాస్ సన్నివేశాలతో మార్కులు వేసుకున్నాడు. కమర్షియల్ సినిమాల్లో కథ పెద్దగా ఉండదు కానీ.. ఇందులో కథ విషయంలో అతను మరీ లైట్ తీసుకున్నాడు. అతను ఎప్పట్లా కామెడీలో తన బలాన్ని చూపించాలని అనుకున్నాడు. అయితే ద్వితీయార్ధంలో తడబడ్డినట్టుగా కనిపించాడు. అయితే తమ్మిరాజు మాత్రం ఇంకాస్త పనిపెట్టింవుంటే సినిమా ఓ రేంజ్ లో దూసుకెళ్లదన్న టాక్ వుంది.

తీర్పు..

‘సరిలేరు నీకెవ్వరు’.. నిడివి ఎక్కువై.. సాగిందే కానీ.. బొమ్మ మాత్రం.. దద్దరిల్లింది.!

చివరగా.. మహేశ్ ఫ్యాన్స్ కు పండగ బోజనమే..!

Posted: January 11, 2020, 8:58 am